Жұма, 23 қаңтар 2009Қазақстанның  еңбек сіңірген әр­тісі Ұлжан Айнақұлованың Жамбыл ауданындағы Қарасай батыр атындағы Мәдениет са­райында өткен шығармашылық кешіне алыс-жақыннан жұрт жиналып, өнер иесіне деген ын­тызар көңіл-ниетін айшықтады.

Сонау жетпі­сінші жыл­да­ры Қазақтың қыздар пе­да­гогикалық институтының музыка фа­куль­тетін  бі­тіріп, “Құ­лан­саз” ансам­бліне келген үкідей сары қыз сахнаға шыққанда құл­пырып,  ерекше рухта­нып, ән әуе­зі­не елітіп, тыңдарманын да өзімен бір­­ге қиял әлеміне ілестіріп әке­тетін. Алдағы өмір мен құбылысқа байыппен қарайтын үлкендер: “Өстеннің осы қызы жанып тұр”, дейтінін талай естідік те.Ұлжан жылдың қай мезгілінде болмасын қыстау мен күздеуде  отырған малшылар мен егінжай­дағы  еңбек адамдары арасында тамылжыта ән шырқап, жағдай таңдамады. Ол халқын әуезді әні­мен тербесе, олардың ыстық ықы­ласы әншінің алдағы күндеріндегі арманына қанат бітірді деуге болады. Бүгінде Ұлжан туған жер мен өскен елге  деген іңкәр сезі­мін бір адамдай-ақ  сезініп, шы­ғармашылығын шыңдап, ізденіс танытып келеді. Оған өнерпаздың өмірдегі, өнердегі өткен жылдары дәлел.Жиналғандар алдында Жам­был ауданының әкімі Ләззат Тұр­лашев құттықтау сөз сөйлеп, ән­шінің шығармашылығына тоқта­лып, күміс қоңыраудай даусымен халыққа рухани нәр беретін  әндерімен қуантсын деген тілегін жеткізіп, иығына зерлі кәжекей жапты.Жер жәннаты Жетісу жері дарынды өнерпаздардан  кенде емес. Солардың қатарында Ұлжан алғашқыда “Айгүл” ансамбліндегі Галина Қарамолдаева мен Ағайша Исағұлова тәрізді ұстаздарынан тәлім алып, әннің жүрекке жетуі әншіге байланысты екендігін ұғынды. Ізденді, әр күнді үкілі үмітімен жалғады. Нәтижесінде баһадүр Қарасай батыр мен жыр сүлейлері Сүйінбай, Жамбыл бабалардың ізі қалған Суықтөбе, Майтөбе, Құлансаз жайлаулары жайлы шырқаған әсем әндері қазақ даласында қалықтап, күлім­көз әншінің мерейін тасытты, елге танытты.Мәдениет үйіне жиналғандар өнерпаздың репертуарындағы жаңа әндердің де тұсауын кесті.  Көрермен алдында Исраил Са­парбаевтың, Орысбай Әбділ­даевтың, Жолдасхан Құрамы­совтың әндерін орындап, оларға деген ізгі ілтипатын білдірді. Ал, Астана мен Алматыдан  арнайы келген ағайын-туыстары да Ұлжанға деген ізгі  ниеттерін арнады. Парламент Мәжілісінің депутаттары Уәлихан Қалижан мен Гүлмира Исімбаева, тағы басқалары өнерпазға  деген ыстық ықыласын білдірсе, Жамбыл, Қарасай ауданындағы іскер бауырлары шетелдік авто­кө­ліктің кілтін тапсырып, ауылдан шыққан өнерпазға деген бауыр­лық ниет-пейілдерін білдірді.Сахнада анасының өнер жо­лын жалғастырған қызы Әсем екеуі қосыла шырқаған ән әуезі де көрерменнен өз бағасын алды. Халық әндерін Ұлжанның орындауында  тыңдасаңыз қазақ­тың жусан иісі аңқыған  кең да­ласында жүргендей боласың. Ол қай әнді орындамасын кемеліне келтіріп, беріле шырқайды. Бұл әншінің әнге деген махаббаты,  еліне, жеріне деген іңкәр сезімі. Осы екі қасиетті қабыстырған өнерпаздардың шығар шыңы алда.Күмісжан БАЙЖАН, Алматы облысы. БАТЫРҒА МҰРАЖАЙ АШЫЛДЫ Қазір елордамыз кең сахара­мыз­дың өткені мен бүгінгісін жа­растырып, жақсы істерге ұйытқы болып отырғанына әрқайсымыз куә болып отырмыз. Соның бір дәлеліндей Астанадағы Райымбек батыр атындағы №50 “Қазғарыш” мектеп-лицейінде қазақ батыр­ла­рына арналған Райымбек батырдың тұңғыш мұражайы ашылды. Батыр­лық пен батылдыққа, отансүйгіш­тікке, елге адал қызмет етуге, ұл-қыз­ды балапан кезінен баулитын бұл мұражайды көріп отырғанда бүкіл қазақ топырағын сыртқы жаудан қорғаған бабалар көз ал­дыңнан өтеді. Ұлтымыздың ұлылы­ғын танытатын жәдігерлерімізді қайта тірілткен теміршілер Махмұт, Айтберген, Тұрсынжан Жетенұл­да­ры мен олардың ізін басып келе жатқан Мұхит атты бозбала жігіттің қолынан шыққан батырлардың мұражайға қойылған бес қаруы көздің жауын алады, көңіліңе дем беріп мерейіңді өсіреді. Әсіресе бөрілі байрақ, басқа киетін дулыға, қалқан, жеңсе, садақ, қорамсақ, құс­тұмсық, шарайна, айбалта, кі­реуке, айыл тұрманы түгел ерто­қым, саптама етік, дырау қамшы – бәрі де үйлесім тауып тұр. Осынау құнды дүниелерді жасап әкелген теміршілердің ерінбейтін еңбектегі төзімділігіне қайран қаласың. Ал мұндай алтынға бергісіз жәдігерді Алматыдан Астанаға жеткізу кезін­де оларға арнайы мәшине беріп, қастарына сақшы қосқан Алматы облыстық МАИ мекемесінің бас­ты­ғы Талғат Ақжігітов пен Серік Кө­пір­баевтың, сондай-ақ елордадағы мұражайдың ашылуына ұйытқы болған кәсіпкер Мәлік Ақыл­бе­ковтің азаматтықтарына теміршілер де, өзге жиналған жұрт та дән ризалығын білдірді.Мұражайдың көгілдір лентасы қиылғаннан кейін мектеп дирек­торы Әлия Сексенова, Астана қалалық білім басқармасы басты­ғы­ның орынбасары Әсият Қоржы­қова, мұражайдың ашылуына ар­найы Райымбек ауданынан келген аудандық мәслихаттың хатшысы Лұқпан Әбек бастаған жігіттер шынайы ризашылықтарын білдіріп, мектепке деген сый-сияпаттарын көрсетті. “Алдағы уақытта біз бұл мұражаймен қарым-қатынасты үзбей, мектеп мұғалімдері мен оқу­шыларын батыр дүниеге келген Мұ­қағали Мақатаев, Бердібек Соқпақбаев, Сағат Әшімбаев, Бақ­қожа Мұқай, Тельман Жанұзақов секілді тума таланттардың кіндігі тамған өңірмен танысуға шақы­рамыз. Мүмкіндік жасау жағын екі жақ кеңесе отырып, шешетін бола­мыз”, деді мәслихат хатшысы.Мұражайдың ашылу салтана­ты­нан кейін ақиық ақын Мұқағали Мақатаевтың “Райымбек! Райым­бек!” поэмасы бойынша компози­ция­лық қойылым көрсетті. 6-шы сы­ныптан бастап 10-шы сыныпқа дейінгі оқушылар қатысқан бұл көрініс жиылған жұрттың ерекше рухын көтерді. Шәкірттердің бүкіл поэманың әр жолын мәнерлеп, ажарын ашып жатқа айтқан тұста­рынан оларды жастарды батыр ру­хы көтергенін көргендей болдық. Осы қойылымды дайындаған мек­теп кітапханашысы А. Жақсы­лы­қо­ва, қазақ тілі мен әдебиет пәнінің мұғалімі Г.Бөкенова, М.Оспанов оқушылардың қай кезде де Райым­бек батыр туралы өлең оқып, ән айтқанда арқаланып кететінін тілге тиек етті.Осы сәт біздің ойымызға Елба­сы Нұрсұлтан Назарбаевтың: “Рай­ым­бек – ең алдымен, елін жауға бер­меген, күні-түні тыным көрме­ген, тұла бойын ақыл-ой, күш-қуат кернеген батыр. Райымбек – халық тағдыры қайқы қылыштың үстінде қылпылдаған заманда жоғыңды жоқтаған жоқшы. Райымбек – қы­зыр шалған көріпкелдігі бар әу­лие... Райымбек бабаны ұлттық рух­тың ұлы әулиесі деп атауға әб­ден болады деп білемін”, деген ата­лы сөзі оралды. Соңынан жиналған жұрт батыр рухына құран бағыш­тады.Сүлеймен МӘМЕТ. РУХАНИ КЕҢІСТІГІМІЗ ҚҰНДЫ ДҮНИЕЛЕРМЕН ТОЛЫҚТЫ Жақында елордадағы Ұлттық академиялық кітапханада үш бірдей еңбектің тұсаукесер рәсімі өтті.  Бі­ріншісі – Әл-Фарабидің араб тілі­нен аударылған “Музыка туралы үлкен кітабы” болса, екіншісі – түркі әлемі мен араб дүниесі ара­лығындағы ежелгі тамырластық байланыстарды зерттеп жүрген Қайрат Сәкидің “Қыпшақ мәмлүк­тер” атты еңбегі. Үшіншісі,  осы қос құнды еңбектің жарыққа шы­ғуына қаржылай қолдау-көмек көр­сеткен Әл-Фараби және Сұлтан Бейба­рыс атындағы қоғамдық қордың төрағасы, музыка жанашыры, белгілі меценат Сапар Ысқақовтың “Әлемнің сегізінші таңғажайыбы немесе дүние дидары жиһангездің көзімен” деген атпен шығарған жолжазбалар жинағы.  Бір айта кететін жәйт, Әл-Фара­би­дің “Музыка туралы кітабы” араб тілінен қазақ тіліне алғаш рет аударылып отырған болса, Шығыс­тың әйгілі энциклопедисінің бұл трактатында ислам әлемі музыка­лық эстетикасының иірімдері жан-жақты талданған. “Біздің ұлы ой­шыл туралы білетінімізден білмей­тініміз көп. Ол өзінен кейінгіге мұра етіп өмірдің сан түрлі саласын қамтыған 170-ке тарта трактат қалдырған. Бірақ біз солардың ішінен 50-ге жуығын ғана білеміз. Міне, осы тұрғыдан алғанда, бұл кітаптың алар орны айрықша”, деді кездесуде сөз алған көрнекті ком­позитор, Мемлекеттік сыйлықтың лауреаты Еркеғали Рахмадиев.Ал сан жылдар бойы араб елде­рінде ғылыми тұрғыда ізденісте жүрген Қайрат Сәкидің “Қыпшақ мәмлүктер” еңбегінің де ұлтымызға берер тағылымдық, танымдық мәні зор дер едік. “Бұл еңбек шын жанашырлық пен ұлттық сананы оятуды сезініп барып жасалған дүние. Екіншіден, біздің тарих туралы жазылған еңбектерімізде көп жағдайда деректілік, нақтылық жетіспейді. Бұл тұрғыдан келгенде де, “Қыпшақ мәмлүктер” біздің көзімізді ашты. Біз көп нәрсені білмейді екенбіз. Бұл еңбектен қазақ жұртшылығына қажетті біраз дүниелерді кездестіруге болады”, деді жазушы Қойшығара Салғара сөз орайында.Бір атап өтерлігі, бұл өз өмірін араб әлемімен байланыстырған Қайрат Сәкидің осы тақырыпқа арналған екінші кітабы екен. Автор бұл еңбегін Мысыр (Египет) мен Шамды (Сирия) XІІІ-XІV ғасыр­лар­да билеген Қыпшақ сұлтандары мен бектері туралы ортағасырлық мұсылман тарихшыларының еңбек­теріне сүйене отырып жазған. Кі­тап­та мәмлүк­тер, оларлың саяси сахнаға шығуы, Мәмлүк мемлеке­тінің құрылуы, оның мемлекеттік құрылымы мен жүйесі және Айбек, Құтыз, Бейбарыс, Қалауын, Ха­лил, Кетбұға, Лашын секілді қыпшақ сұл­тандары жайлы тың деректердің мол­дығы жайлы тұсаукесерде кеңінен сөз болды.Бұл күні, сондай-ақ қазақ ұлт­тық мәдениетінің жанашырына айналған Сапар Ысқақовтың “Әлем­нің сегізінші таңғажайыбы не­месе дүние дидары жиһангез кө­зі­мен” атты жолжазбалар жинағына да көпшілік қауым өз ықылас-пейілдерін танытты. Бұл кітапты жазудағы мақсатым – әлемдегі түрлі халықтар туралы, олардың мәдениеттері, тарихы, өмір салты жайлы өзіміздің оқырманмен ой бөлісу еді. Мен әлемнің жүзден астам елінде болдым. Сондағы сезінген, білгенімді жалпақ жұртқа  жеткізгім келді , дейді С.Ысқақов.  Ләйла ЕДІЛҚЫЗЫ. “ӨМІРІМДІ ӨНЕРГЕ АРНАЙМЫН” Шымкент қаласында жетім балалар арасында “Өмірімді өнерге арнаймын” атты республикалық балалар шығармашылығы конкурсының жеңімпаз­дарын салтанатты марапаттау рәсімі өтті.Салтанатты жиынды ашқан ОҚО әкімінің орынбасары Әли Бектаев он саусағынан өнері тамған балғындарға аға-әпкелері атынан ақ тілеу  айтты. Білім және ғылым министрлігінің Балалардың құқықтарын қорғау комитеті мен Еуразия практикалық психология және психотерапия институты бірлесе өткізген шараға Оңтүстіктің мырза жігіттері айтарлықтай үлес қосты. Солардың бірі “ОҚО кәсіпкерлері мен шаруаларын қолдау қорының” басқарушысы Раис Қараибрагимов: “бәріміз де бала асырап отырмыз. Әке-шешесі бар баланың жылағаны бір басқа, ал тұл жетімнің жылағаны басқаша болады. Жүрегі ізгі адамдар мұндайда қайырымдылықтан тыс қалмауы керек”, деді.Конкурс жеті номинация бойынша, атап айтқанда, тоқыма, ағашты көркем өңдеу, керамика, шыныны көркем өңдеу, металды көркем өңдеу, бейнелеу және мүсіндеу өнерлері бойынша өтті.Іріктеу кезеңіне 6-18 жас аралығындағы балалар жас ерекшеліктеріне қарай үш топқа бөлініп қатысқан болатын.“Жүзден жүйрік, мыңнан тұлпар” дегендей, аймақтық кезеңдер жеңімпаздары өздерінің жұмыстарының шешуші кезеңін Шымкентте қорытындылады. Металл, керамикамен жұмыс жасауға қолының ебі бар балауса таланттардың еңбектері бірінен-бірі өтеді. Бағасын таразылауға осы істің өз мамандары керек.Сондықтан, олардың жұмыстарын республи­ка­ның көркемөнер оқу орындарының, сәндік-қол­дан­балы және халық өнері мұражайларының танымал мамандарынан құралған қазылар алқасы бағалады.Мұндағы қуанышты бір жағдай, балалар шебер мамандардан мастер-класс дәрісін алу мүмкіндігіне ие болды.Үш күнге созылған өнер бәйгесінде жекелеген номинациялар бойынша Гран-Приге Кешубаева Динара (Астана), Пистер Ольга (Қарағанды облысы), Нарнураев Самрат (Оңтүстік Қазақстан облысы), Пенкова Дарья (Астана), Кенжетай Қуаныш (Оңтүстік Қазақстан облысы) және Пистер Дарья (Қарағанды облысы) ие болды.Бас жүлдені жеңіп алғандар демеушілер тарапынан барлық керек-жарағы сай компьютер алса, бірінші орын алғандар сандық фотоаппаратпен марапатталды.Бақтияр ТАЙЖАН, Шымкент. “ҮМІТ ҮЗГІМ КЕЛМЕЙДІ” УКРАИН ТІЛІНДЕ ЖАРЫҚ КӨРДІ Кеңес Одағы ыдырағалы бері бұрын бір мемлекетке ұйысқан ұлттар­дың арасындағы әдеби байланыстардың кетеуі кетіп, арқауы үзіле бастағаны рас. Сондықтан да бүгінгі таңда алыс шет елдер тұрмақ, ке­шегі кеңестік кеңістік республикаларында қазақ жазушылары шығарма­ларының жарық көруінің өзі сирек кездесетін жағдайға айналып барады. Сондай сиректердің арасында жақында Киевтің “Дніпро” баспасынан шыққан көрнекті қаламгер, танымал әдебиеттанушы Немат Келімбетовтің “Не хочу втрачати надію” жинағы да бар.Кітапқа жазушының “Үміт үзгім келмейді” повесть-монологы мен кезінде “Егемен Қазақстанда” жарияланып, оқырман қауымның ыстық ықыласына бөленген “Ұлыма хат” эссесі енгізілген. Украин оқырман­дарының талғам таразысына тартылып отырған талантты туындылардың қадір-қасиеті Қазақстанның халық жазушысы, Мемлекеттік сыйлықтың лауреаты Әзілхан Нұршайықовтың “Поема про героізм і мудрість” аталған алғысөзінде айшықты ашылған.“Егемен-ақпарат”. БАДМИНТОН: шеберлік жолында Спорттың бұл түрі шын мәнінде халықтық десе болғандай. Оны үлкен де, кіші де, ұл да, қыз да ойнайды. Және жер таңдап та жатпайды. Нағыз жарыстар болмаса, оны тор жаймай-ақ ашық аспан астында ойнай береді.Ал жарыстардың орны бөлек. Кезінде, сонау кеңестік заманда спорттың бұл түрі бойынша жарыс­тар көп өтетін. Онда Қазақстан бадминтоншылары айтар­лықтай беделді де еді, үлкен жарыстарда жүлдеге де ие болып жүретін. Соңғы кезде бадминтоншыларымыз халықара­лық жарыстарға көп қатыса бермейді. Әрине, спорт жанкүйер­лері олардан жеңіс күтеді.Жақында ғана Алматыда өткен бад­минтоннан ел біріншілігі осынау жарысқа келген көрермендерді де, мамандарды да қуантты десек, артық айтқандық емес. Әрине, біріншілік болған соң, орнына қарай жүлде үлестіріледі. Бізді қуантқаны – жарыстың мазмұны, оған қатысу­шылардың шеберлігі, еліміздің жер-жерінде бұл спорт түрінің айтарлықтай даму үстінде екендігі.Осы жарысқа еліміздің жеті аймағы­нан ойыншылар қатысты. Әрине, барлық жерінен де қатысса, жарыс бүгінгіден де тартысты болар еді. Көрші өзбек ағайын­дар да біздің біріншілікке спортшыларын жіберіп, тәжірибе жинақтауды көздепті. Жарысқа халықаралық сипат берген мұны да құп көрдік.Ден қойса, бұл спортта айтарлықтай жеңіске жетуге болатынын Қостанай облысының тәжірибесі айқын аңғартты. Олардың командасын кезінде КСРО құрамасында ойнаған Людмила Окунева мен Игорь Дмитриев бастап келді. Ең қуаныштысы – команда құрамында жастар баршылық.Қазақстанның бадминтон жөніндегі мемлекеттік жаттықтырушысы Мәлік Бейсәлиевтің айтуынша барлық жерде балалар-жасөспірімдер бадминтонына айтарлықтай мән беріліп отырған көрінеді. Алматыда бұл спорт жөнінде бөлім ашылған, ал Қызылорда қаласында тамаша база жасалынған. Тек қана онда жақсы жаттықтырушы қажет болып отыр.Финалда қыз-келіншектердің жұп разряды бойынша Қазақстандағы жетекші төрт ойыншы өнер көрсетті. Ол шын мәніндегі өнер болды. Халықаралық тәжірибесі бар қостанайлық Елизавета Яковлева мен қарағандылық Карина Сулеева жұптасып, тәжірибелі спорт шеберлері алматылық Вероника Соро­кина мен көкшетаулық Ромуалда Волосқа қарсы ойнады. Тәжірибелі алматылық және көкшетаулық жеңіске жетті.Жеке разрядта да Яковлева мен Сорокина финалға шығып, алматылық бадминтоншы чемпион атанды. Ерлер арасында жұп разряд бойынша республи­ка чемпионы атағы үшін жастар мен тәжірибелілер күш сынасты. Қостанай­лық Самат Ержақанов пен Михаил За­харов алматылық тәжірибелі ойыншылар Родион Закиров пен Жомарт Дәулетә­лиевке қарсы шеберліктерімен көзге түсті. Бұл жерде жастар басымдылығын көрсет­ті. Алтын медальға Ержақанов пен Захаров ие болды.Жеке разряд бойынша жүлделі орындарға Михаил Захаров (Қостанай), Асқар Орманов (Оңтүстік Қазақстан), Антон Кноль (Қарағанды) және Виктор Говенко шықты.Енді аралас разрядқа келсек, жоғарғы сатыға Қостанайдан келген жұп Михаил Захаров пен Елизавета Яковлева көте­рілді. Сондай-ақ командалық есепте де қостанайлықтар бірінші орынды ешкімге берген жоқ. Екінші және үшінші орында – Алматы мен Қарағанды облыстары.Бадминтоннан өткен республика чемпионатын спорттың осынау түрін дамытудағы және шеберлік шыңдау жолындағы жаңа бір белес десек жөн сияқты. Республика бас жаттықтыру­шы­сы Мәлік Бейсалиевтің айтуына қара­ғанда, алдағы жылы бадминтон­шылары­мызды үлкен халықаралық жарыстар күтіп тұр екен. Сәуір айында Азия құрлығының чемпионаты өтсе, мамыр айында әлем чемпионатының туы көтеріледі. Оған біздің ойыншыларымыз толық құрамда қатысу үшін біраз тер төгуге тура келеді. Ал бұл жарыстар әлемге елімізді таныстыру үшін де керек.Республика чемпионаты бізде өсіп келе жатқан жастар барлығын көрсетті. Онда екі жас ойыншы, атап айтқанда, Антон Кноль мен Виктор Говенко спорт шебері нормасын орындады. Ал халық­ара­лық жарыстарда жүлдеге жету үшін халықаралық деңгейдегі ойыншылар керек. Ел біріншілігін тамашалағанда, көңілімізде соған да жететін күн болар деген сезім ұялағанын жасырмайық.Мамадияр ЖАҚЫП, Юрий ЛИФИНЦЕВ. МҰРАҒАТСЫЗ ТАРИХ ЖОҚ Ғылым мен білімнің ошағы болып саналатын Арқа төріндегі Л.Н. Гумилев атындағы Еуразия ұлттық университетінде салиқалы да танымды кездесулер өткізу дәстүрге айналды. Сондай кездесулердің бірі әрі бірегейі күллі мұсылман қауымның қасиетті Құрбан айт мерекесі қарсаңында болып өткен еді. Көпшілік қауымның басын қосқан аталмыш кездесу, экономика ғылымдарының кандидаты, профессор Болатбек Әсемовтің шығармашылығына арналды.12 томдық құжаттар жинағының авторы М. Әсемов Ташкент қаласындағы қаржы-экономика институтын бітіре салысымен, өз еңбек жолын осы саладан бастады. Ұзақ жылдар бойы қаржы саласында қызмет етіп, басшылық қызметтер атқарғанына қарамастан, өзінің шығармашылық жұмысын да қатар алып жүрді. 1999 жылдан бастап төл тарихымызға байланысты әлі белгісіз болып келе жатқан көптеген құндылықтардың сырын ашып, мұрағаттық зерттеу саласына айтарлықтай еңбегін сіңірді.Тарихтан сыр шертетін шежірелерді Б.Әсемов Ресейдің бірнеше қалаларындағы мұрағаттар табалдырығын тоздырып, қазақ халқының тарихы жайлы көптеген материалдар жинақтады. Мәскеудегі 6 мұражайда ел тарихына елеулі ықпал ететін құнды мұрағаттық деректерді ізденімпаздықтың арқасында тауып, соның нәтижесінде 12 томдық құжаттар жинағы жарық көрді.“Абылай хан”, “Кенесары”, “Тәттімбет”, т.б. шығармаларында тарихта аты қалған тұлғалар жайлы тың, бұрын-соңды айтылмаған ғажап дүниелер, құндылықтарды кездестіруге болады.“Бұл кісінің шығармашылығын қара басы мен қалтаның қамы үшін жасалған нәрселер деп айту үлкен қателік болар еді. Б.Әсемовте бір ғана мақсат бар, ол халқының, елінің тарихи шындығын ашу. Жеке өз басым бұл жұмысқа болашақ ұрпақ үшін өте пайдалы дүниелер деп баға беремін. Өйткені, қазіргі тарихымыз толық емес. Ал тарихтың толық жазылуына Бөкең сияқты азаматтар өте қажет. Б.Әсемовтің жинаған материалдары шикізат болғанымен, ұлт тарихы үшін аса маңызды. Жан-жақты ізденіс пен зерттеудің нәтижесінде ғана халық тарихтың шындығына куә бола алады. Біз бұл еңбектің қадірін білетін адамдармыз. Қадірін білгендіктен осындай еңбек жазған кісінің алдында басымызды иеміз, үлкен құрметпен қараймыз,”-деп оған Мемлекеттік сыйлықтың лауреаты, филология ғылымдарының докторы, профессор Ақселеу Сейдімбек өз бағасын беріп, ағынан жарылды.

Арай ҮЙРЕНІШБЕКҚЫЗЫ.